其实件事都发生左好多年, 我係因为当时真係好怕, 所以一直都唔同人分享出黎, 近排叫做件事个感觉冇咁重, 所以就打算分享下畀大家, 当係放低件心事
本身我妈妈係泰国人. 係以前读书啲暑假总会返下去个零星期至成个月不等, 因为有年妈妈要去亲戚到整啲野, 所以我就自己一个人去住酒店, 间唔中先同妈妈会合去玩下食下野
因为成个月租平好多, 一租就租左一个月, 间酒店唔係啲咩五星级靓野, 但都叫不过不失, 要有嘅都有
第一晚到步后因为太夜, 我check in 后冲完凉就即刻训左
第二日朝早起身要出门果时, 我就突灯係行李箱到拎左件皮褛挂係衣柜先再出门 (因为自己好锺意件皮褛, 怕佢压到有纹), 而且因为怕佢跌出黎, 仲拉好件皮褛拉鍊先走
果日夜晚食完饭返到黎果时, 一入房就发现件皮褛唔见左, 行入房之后先发现件皮褛摊平放左係床上面, 拉鍊仲打开埋
我以为係酒店员工帮我汁房, 所以挂返好佢就训
之后都冇咩野, 但到第五日, 再有怪事发生
因为果日我妈妈约左朋友, 咁我就留係酒店休息
一直相安无事, 但去到夜晚8点几, 突然有 "人" 敲我门
我见8点几姐, 应该係酒店员工, 就走去防盗眼睇睇咩事先
发现咩人都冇, 我就坐返埋房继续玩手机
点知去到12点几果时, 再有 "人"" 敲我门, 我下意识觉得有人玩门, 就火速衝去开门
正常开门之后人係会先睇右边, 但果下我唔知点解好想睇左边先
望见左边无人, 转去望右边都係无人, 我个心突然离一离
然后我间房个电视突然自己开左......
我吓L到即刻打开哂道房门, 係咁招手叫 "佢" 走
之后就即刻打电话, 同酒店啲人讲我间房咩事, 佢地就即刻转左间房畀我
好死唔死, 酒店转左间尾房畀我, 我因为太怕都唔记得左尾房唔係好野, 就转左房......
虽然转左房之后都冇再有特别野发生, 但去到我住到尾三果日, 我再中左招......
果日开开心心玩完, 食饱饱返酒店
因为我好饱, 想行下, 就行楼梯直接上自己尾房间房
一行到去果一层果时, 我背脊突然好鬼冻......
我以为有冷气吹到, 一转身向上望, 咩都无......
我谂住快快咁返房就冇野, 点知一行到走廊位, 有一个着白裙嘅人得返半个身贴左係墙到
我当时死忍住唔叫, 即刻衝返去大堂求救
我果时已经成身冷汗, 最后我唔敢再返上去, 成晚都係酒店大堂过......
尾二果两日, 我拜託左我妈妈去边我都要跟住去, 要我训地下都可以......
最后我都叫平安无事返番香港......
係到同大家讲, 如果你觉得酒店有野, 记得要转, 唔好因为钱而继续住, 真係会出事...